കാപ്പ ചുമത്താൻ പോലീസ് ശുപാർശ

വളാഞ്ചേരി : സമൂഹമാധ്യമങ്ങളിലൂടെ ആളുകളെ വെല്ലുവിളിക്കുകയും സാമൂഹ്യവിരുദ്ധ പ്രവർത്തനങ്ങളിൽ ഏർപ്പെടുകയും ചെയ്തിരുന്ന വ്‌ലോഗർ വളാഞ്ചേരി കൊട്ടാരം സ്വദേശി നിയാസ് കൊട്ടാരം പോലീസ് പിടിയിലായി. എറണാകുളത്തുനിന്ന് വളാഞ്ചേരി പോലീസാണ് ഇയാളെ സാഹസികമായി പിടികൂടിയത്. നിരവധി ക്രിമിനൽ കേസുകളിൽ പ്രതിയായ ഇയാൾ ഒളിവിൽ കഴിഞ്ഞുവരികയായിരുന്നു. വളാഞ്ചേരിക്ക് പുറമെ ജില്ലയിലെ വിവിധ പോലീസ് സ്റ്റേഷനുകളിലും ഇയാൾക്കെതിരെ ഗുരുതരമായ കുറ്റകൃത്യങ്ങൾക്ക് കേസുകൾ നിലവിലുണ്ട്. സ്ഥിരം കുറ്റവാളിയായതിനാൽ പ്രതിക്കെതിരെ കാപ്പ (KAAPA) ചുമത്താൻ പോലീസ് ഇപ്പോൾ ശുപാർശ ചെയ്തിരിക്കുകയാണ്.പകൽ സമയങ്ങളിൽ വിവിധ വ്യാപാര സ്ഥാപനങ്ങളിൽ പ്രൊമോഷൻ് പേരിൽ എത്തുന്നതായിരുന്നു ഇയാളുടെ രീതി. എന്നാൽ രാത്രിയാകുമ്പോൾ ജനവാസ കേന്ദ്രങ്ങളിലും പൊതുറോഡുകളിലും കക്കൂസ് മാലിന്യം തള്ളുന്നത് ഇയാൾ പതിവാക്കിയിരുന്നു. നാട്ടുകാർക്കും യാത്രക്കാർക്കും വലിയ തോതിലുള്ള ആരോഗ്യപ്രശ്‌നങ്ങളും ബുദ്ധിമുട്ടുകളും ഇത് സൃഷ്ടിച്ചിരുന്നു. മാലിന്യം തള്ളുന്നതുമായി ബന്ധപ്പെട്ട നിരവധി പരാതികൾ ഇയാൾക്കെതിരെ പോലീസിന് ലഭിച്ചിരുന്നു. ഇത്തരം പ്രവൃത്തികളിലൂടെ നാടിന്റെ സമാധാന അന്തരീക്ഷം തകർക്കാനാണ് ഇയാൾ ശ്രമിച്ചിരുന്നത് ഇൻസ്റ്റാഗ്രാം പോലുള്ള സമൂഹമാധ്യമങ്ങൾ വഴി യുവാക്കളെ തെറ്റായ വഴിയിലേക്ക് നയിക്കുന്നതിലും ഇയാൾ മുൻപന്തിയിലായിരുന്നു. ലഹരി ഉപയോഗത്തെ പ്രോത്സാഹിപ്പിക്കുന്ന തരത്തിലുള്ള വീഡിയോകൾ ഇയാൾ നിരന്തരം പങ്കുവെച്ചിരുന്നു. അക്രമവാസന വളർത്തുന്ന രീതിയിലുള്ള സംഭാഷണങ്ങളും ദൃശ്യങ്ങളും ഇയാളുടെ സോഷ്യൽ മീഡിയ അക്കൗണ്ടുകളിൽ വ്യാപകമായിരുന്നു. മുഖംമൂടി ധരിച്ച് ആളുകളെ വെല്ലുവിളിക്കുന്നത് ഇയാൾ ഒരു ഹരമായി കൊണ്ടുനടന്നു. ഇത്തരത്തിലുള്ള വീഡിയോകൾ കണ്ട് നിരവധി യുവാക്കൾ ഇയാളുടെ സ്വാധീനവലയത്തിൽ അകപ്പെട്ടിട്ടുണ്ടെന്നാണ് പോലീസ് കണ്ടെത്തൽ.തുടർച്ചയായ സാമൂഹ്യവിരുദ്ധ പ്രവർത്തനങ്ങൾ കണക്കിലെടുത്താണ് ഇയാൾക്കെതിരെ കടുത്ത നിയമനടപടികൾ സ്വീകരിക്കാൻ പോലീസ് തീരുമാനിച്ചത്. കാപ്പ ചുമത്തുന്നതോടെ ഇയാൾക്ക് ദീർഘകാലം കരുതൽ തടങ്കലിൽ കഴിയേണ്ടി വരും. ക്രിമിനൽ പശ്ചാത്തലമുള്ള ബ്ലോഗർമാർക്കെതിരെ കർശന നടപടി സ്വീകരിക്കുമെന്ന പോലീസിൻ്റെ മുന്നറിയിപ്പ് കൂടിയാണിത്. സൈബർ ലോകത്തെ ക്രിമിനലുകളെ അമർച്ച ചെയ്യുക എന്ന ലക്ഷ്യത്തോടെയാണ് അന്വേഷണസംഘം നീങ്ങുന്നത്. ഇയാളുടെ സാമ്പത്തിക ഇടപാടുകളെക്കുറിച്ചും പോലീസ് വിശദമായി അന്വേഷിക്കുന്നുണ്ട്.തിരൂർ കോടതിയിൽ ഹാജരാക്കിയ പ്രതിയെ

നിലവിൽ റിമാൻഡ് ചെയ്ത‌ിരിക്കുകയാണ്. ഇയാളെ കസ്റ്റഡിയിൽ വാങ്ങി കൂടുതൽ തെളിവുകൾ ശേഖരിക്കാനാണ് പോലീസിന്റെ നീക്കം. വരും ദിവസങ്ങളിൽ ഇയാൾക്ക് സഹായം നൽകിയ കൂടുതൽ പേർ പിടിയിലായേക്കും. കുറ്റകൃത്യങ്ങൾക്കായി ഉപയോഗിച്ചിരുന്ന വാഹനങ്ങളും ഇലക്ട്രോണിക് ഉപകരണങ്ങളും പോലീസ് പിടിച്ചെടുത്തിട്ടുണ്ട്. സൈബർ സെല്ലിന്റെ സഹായത്തോടെ ഇയാളുടെ മുൻകാല വീഡിയോകളും സന്ദേശങ്ങളും പരിശോധിച്ചുവരികയാണ്.