തലശ്ശേരി :അഞ്ച് പതിറ്റാണ്ടോളം നീണ്ട കാത്തിരിപ്പിന് വിരാമമിട്ട് തലശ്ശേരി-മാഹി ബൈപ്പാസ് യാഥാര്‍ഥ്യം. ദേശീയപാത വഴി തലശ്ശേരി, മാഹി ടൗണുകൾ കടക്കാൻ ഒന്നര മണിക്കൂറോളം സമയമെടുത്ത നാളുകളാണ് ഇനി വെറും ഇരുപത് മിനിറ്റിലേക്ക് ചുരുങ്ങുന്നത് .ദേശീയപാത 66 ന്റെ ഭാഗമായ തലശ്ശേരി– മാഹി ബൈപാസ് കഴിഞ്ഞ ദിവസം പ്രധാനമന്ത്രി നാടിന് തുറന്നു കൊടുത്തു.

ഇതോടെയാണ് മുഴപ്പിലങ്ങാട് മഠം ജംക്‌ഷൻ മുതൽ അഴിയൂർ വരെയുള്ള 18.6 കിലോമീറ്റർ ദൂരം താണ്ടാൻ ഇനി പരമാവധി 20 മിനിറ്റ് സമയം മാത്രം ആകുക.ബൈപാസ് തുറക്കുന്നതോടെ തലശ്ശേരി, മാഹി ടൗണുകളിലെ ഗതാഗതക്കുരുക്കഴിയുമെങ്കിലും മുൻപ് വാഹനങ്ങൾ പോയിരുന്ന പാതയിൽ വാഹനങ്ങൾ കുറയുന്നത് വ്യാപാര മേഖലയെ ബാധിക്കുമെന്ന് ആശങ്കയുണ്ട്.

ഈ മാറ്റം ഇരു പട്ടണങ്ങളുടെയും സാമ്പത്തിക മേഖലയെ ബാധിക്കാതിരിക്കാൻ പരിഹാരമായി വിനോദസഞ്ചാര പദ്ധതികൾ നിർദേശിച്ചത് ആശ്വാസത്തിന് വഴിയുണ്ട് .പൈതൃക നഗരങ്ങൾ എന്ന നിലയിൽ ഏറെ പ്രാധാന്യമുണ്ട് തലശ്ശേരിക്കും മാഹിക്കും രണ്ടു പട്ടണങ്ങൾക്കും. പ്രകൃതിസൗന്ദര്യവും ആവോളമുള്ളതുകൊണ്ട് ചരിത്രാന്വേഷികൾക്കു പുറമേ, സഞ്ചാരികളും തീർച്ചയായും ഒഴുകിയെത്തും.

തിരക്കൊഴിയുന്ന പാതകൾ വഴി സഞ്ചാരികളെ സ്വാഗതം ചെയ്യുകയും അവർക്ക് ഹൃദ്യമായ ആതിഥ്യമരുളി കൂടുതൽപേരെ ആകർഷിക്കുകയും ചെയ്യാം…