തിരുവനന്തപുരം: നവകേരള സദസിനിടെ ഉണ്ടായ പ്രതിഷേധങ്ങളുമായി ബന്ധപ്പെട്ട് വലിയ വിവാദങ്ങൾക്ക് വഴിവെച്ച ‘രക്ഷാപ്രവർത്തന’ കേസിൽ മുൻ മുഖ്യമന്ത്രി പിണറായി വിജയന്റെ ഗൺമാൻമാർക്കെതിരെ പുനരന്വേഷണം നടത്താൻ പ്രത്യേക അന്വേഷണസംഘം രൂപീകരിക്കുമെന്ന് മുഖ്യമന്ത്രി വി.ഡി സതീശൻ. നവകേരള സദസിനെതിരെ പ്രതിഷേധിച്ച യൂത്ത് കോൺഗ്രസ്, കെഎസ്യു‌ പ്രവർത്തകരെ മുൻ മുഖ്യമന്ത്രിയുടെ സുരക്ഷാ ഉദ്യോഗസ്ഥർ ക്രൂരമായി മർദ്ദിച്ചെന്ന പരാതിയിൽ നേരത്തെ അന്വേഷണം നടന്നിരുന്നു. എന്നാൽ, ഈ അന്വേഷണം തൃപ്‌തികരമല്ലെന്നും ഉദ്യോഗസ്ഥരെ സംരക്ഷിക്കുന്ന നിലപാടാണ് പൊലീസിന്റെ ഭാഗത്തുനിന്ന് ഉണ്ടായതെന്നും ആരോപിച്ച് പരാതിക്കാർ കോടതിയെ സമീപിക്കുകയായിരുന്നു. ഹരജി പരിഗണിച്ച കോടതി, കേസിൽ പുനരന്വേഷണം വേണമെന്നും ഇതിനായി ഉയർന്ന ഉദ്യോഗസ്ഥരുടെ നേതൃത്വത്തിൽ പ്രത്യേക സംഘത്തെ നിയോഗിക്കണമെന്നും ഉത്തരവിട്ടു. കോടതി വിധി നടപ്പാക്കുന്നതിന്റെ ഭാഗമായാണ് ഇപ്പോൾ SIT രൂപീകരണത്തിലേക്ക് കാര്യങ്ങൾ നീങ്ങുന്നത്. നവകേരള സദസ് വാഹനത്തിന് നേരെ കരിങ്കൊടി കാണിച്ച പ്രതിഷേധക്കാരെ മുഖ്യമന്ത്രിയുടെ ഗൺമാനും മറ്റ് സുരക്ഷാ ഉദ്യോഗസ്ഥരും ചേർന്ന് ലാത്തിയും കൈയും ഉപയോഗിച്ച് മർദ്ദിച്ചതായിരുന്നു വിവാദങ്ങൾക്ക് ആധാരം. എന്നാൽ, ഈ മർദ്ദനത്തെ ‘പ്രതിഷേധക്കാരുടെ ജീവൻ രക്ഷിക്കാനുള്ള ശ്രമം’ എന്നാണ് അന്ന് മുഖ്യമന്ത്രിയും ഭരണപക്ഷവും ന്യായീകരിച്ചത്. ഈ പ്രയോഗം രാഷ്ട്രീയ വൃത്തങ്ങളിലും പൊതുസമൂഹത്തിലും വലിയ രീതിയിലുള്ള പ്രതിഷേധങ്ങൾക്ക് വഴിവെച്ചിരുന്നു. പുതിയതായി രൂപീകരിക്കുന്ന പ്രത്യേക അന്വേഷണസംഘം സംഭവത്തിന്റെ വിവിധ ദൃശ്യങ്ങൾ, സാക്ഷിമൊഴികൾ, മുൻപ് ശേഖരിച്ച തെളിവുകൾ എന്നിവ വീണ്ടും പരിശോധിക്കും. സുരക്ഷാ ഉദ്യോഗസ്ഥർ തങ്ങളുടെ പരിധി ലംഘിച്ചോ എന്നും, ഗുരുതരമായ പരിക്കേൽപ്പിക്കാൻ മനഃപൂർവം ശ്രമിച്ചോ എന്നതുമാണ് SIT പ്രധാനമായും അന്വേഷിക്കുക. കോടതിയുടെ നേരിട്ടുള്ള നിരീക്ഷണത്തിലായിരിക്കും അന്വേഷണ പുരോഗതി റിപ്പോർട്ട് സമർപ്പിക്കുക എന്നാണ് സൂചന. വരും ദിവസങ്ങളിൽ ഗൺമാൻമാരെ ചോദ്യം ചെയ്യുന്നതടക്കമുള്ള നടപടികളിലേക്ക് പ്രത്യേക സംഘം കടക്കുമെന്നാണ് വിവരം.