തിരുവനന്തപുരം: ഓണത്തിന് റെക്കോഡ് മദ്യവില്‍പനയുമായി ബെവ്കോ. ഓണം സീസണിലെ 10 ദിവസങ്ങളില്‍ ഷോപ്പുകളിലൂടെയും വെയർഹൗസുകളിലൂടെയുമായി മൊത്തം 826 കോടി രൂപയുടെ മദ്യമാണ് വിറ്റഴിച്ചത്

കഴിഞ്ഞ വർഷത്തേക്കാള്‍ 50 കോടി രൂപയുടെ അധിക വില്‍പനയാണ് ഉണ്ടായിട്ടുള്ളത്. കഴിഞ്ഞ വർഷം 776 കോടി രൂപയുടെ മദ്യമായിരുന്നു ഓണക്കാലത്ത് വിറ്റുപോയത്.

ഉത്രാട ദിനത്തില്‍ മാത്രം 137 കോടി രൂപയുടെ മദ്യമാണ് സംസ്ഥാനത്ത് വിറ്റത്. 9.21% വർദ്ധനവാണ് കഴിഞ്ഞ വർഷത്തേക്കാള്‍ ഉത്രാടദിനത്തിലുണ്ടായിട്ടുള്ളത്. കഴിഞ്ഞ വർഷം 126 കോടി രൂപയുടെ മദ്യമാണ് ഉത്രാടത്തില്‍ വിറ്റത്.

ഉത്രാട ദിനത്തില്‍ ആറ് ഔട്ട്ലെറ്റുകള്‍ ഒരു കോടിയിലധികം വരുമാനം നേടി. ഇതില്‍ മൂന്ന് ഔട്ട്ലെറ്റുകളും കൊല്ലം ജില്ലയിലാണ്. കൊല്ലം വെയർഹൗസിന് കീഴിലുള്ള കരുനാഗപ്പള്ളി ഔട്ട്ലെറ്റിലാണ് ഏറ്റവും കൂടുതല്‍ വില്‍പ്പന നടന്നത്. ഒരു കോടി 46 ലക്ഷം രൂപയുടെ മദ്യമാണ് വിറ്റുപോയത്. കൊല്ലം വെയർഹൗസിന് കീഴിലുള്ള കാവനാട് (ആശ്രാമം) ഔട്ട്ലെറ്റില്‍ ഒരു കോടി 24 ലക്ഷം രൂപയുടെയും പെരിന്തല്‍മണ്ണ വെയർഹൗസിന് കീഴിലുള്ള ഇടപ്പാള്‍ കുറ്റിപ്പാല ഔട്ട്ലെറ്റില്‍ ഒരു കോടി 11 ലക്ഷം രൂപയുടെയും ചാലക്കുടിഔട്ട്ലെറ്റില്‍ ഒരു കോടി ഏഴുലക്ഷം രൂപയുടെയും ഇരിഞ്ഞാലക്കുട ഔട്ട്ലെറ്റില്‍ ഒരു കോടി മൂന്നുലക്ഷം രൂപയുടെയും കുണ്ടറയില്‍ ഒരു കോടി രൂപയുടെയും മദ്യം ഉത്രാടദിനത്തില്‍ വിറ്റുപോയി.