മലപ്പുറം: ജില്ലയിൽ തദ്ദേശ സ്വയംഭരണ സ്ഥാപനങ്ങളിലേക്കുള്ള പൊതു തിരഞ്ഞെടുപ്പിനുള്ള എല്ലാ ഒരുക്കങ്ങളും സുരക്ഷാ ക്രമീകരണങ്ങളും പൂർത്തിയായി ഡിസംബർ 11 വ്യാഴാഴ്ച രാവിലെ 7 മണി മുതൽ വൈകീട്ട് 6 മണി വരെയാണ് വോട്ടെടുപ്പ് നടക്കുക. രാവിലെ 6 മണിക്ക് മോക് പോൾ നടത്തും. പോളിങ് സാമഗ്രികളുടെ വിതരണം ഇന്ന് (ഡിസംബർ 10, ബുധൻ) രാവിലെ മുതൽ നടക്കും.*

ജില്ലയിലെ 15 ബ്ലോക്കുകളിലും 12 മുൻസിപ്പാലിറ്റികളിലുമായി 27 സ്വീകരണ, വിതരണ കേന്ദ്രങ്ങളാണ് സജ്ജമാക്കിയിട്ടുള്ളത്.​വോട്ടർമാരുടെ എണ്ണം:

• മലപ്പുറം ​ജില്ലയിൽ 17,40,280 പുരുഷന്മാരും 18,78,520 സ്ത്രീകളും 51 ട്രാൻസ്ജെൻഡറുകളും ഉൾപ്പെടെ 36,18,851 വോട്ടർമാരാണ് സമ്മതിദാനാവകാശം വിനിയോഗിക്കാൻ അർഹരായുള്ളത്. ജില്ലയിൽ 94 ഗ്രാമപഞ്ചായത്തുകളിലായി 29,91,292 വോട്ടർമാരുണ്ട് (പുരുഷൻ- 14,38,848, സ്ത്രീകൾ- 15,52,408, ട്രാൻസ്ജെൻഡർ 36). ​12 നഗരസഭകളിലായി 6,27,559 വോട്ടർമാരുണ്ട് (പുരുഷൻ- 3,01,432, സ്ത്രീകൾ- 3,26,112, ട്രാൻസ്ജെൻഡർ 15). ​കൂടാതെ, 517 പ്രവാസി വോട്ടർമാർ ഗ്രാമപഞ്ചായത്തിലും 85 പേർ മുൻസിപ്പാലിറ്റികളിലുമുണ്ട്.*

1. ​ജില്ലയിൽ ​94 ഗ്രാമപഞ്ചായത്ത്, 15 ബ്ലോക്ക് പഞ്ചായത്ത്, ജില്ലാ പഞ്ചായത്ത്, 12 മുൻസിപ്പാലിറ്റികൾ എന്നിവയുൾപ്പെടെയുള്ള ജില്ലയിലെ 122 തദ്ദേശ സ്ഥാപനങ്ങളിലെ 2,789 വാർഡുകളിലേക്കാണ് (മാറ്റിവെച്ചത് ഉൾപ്പെടെ) തിരഞ്ഞെടുപ്പ് നടക്കുന്നത്.*

8,381 സ്ഥാനാർത്ഥികളാണ് മത്സരരംഗത്തുള്ളത്. ഇതിൽ 4,363 പുരുഷന്മാരും 4,018 സ്ത്രീകളുമുണ്ട്. തിരഞ്ഞെടുപ്പിനായി 4,343 പോളിങ് സ്റ്റേഷനുകളാണ് സജ്ജമാക്കിയിട്ടുള്ളത്. പോളിങ് ഡ്യൂട്ടിക്കായി 20,848 ഉദ്യോഗസ്ഥരെയും സുരക്ഷാ ചുമതലയ്ക്കായി 7,000-ത്തോളം ഉദ്യോഗസ്ഥരെയും നിയോഗിച്ചിട്ടുണ്ട്.