വല്ലപ്പുഴ :സ്കൂളിൽ പോകുമ്പോഴും വരുമ്പോഴും പല തരത്തിലുള്ള കുസൃതികൾ ഒപ്പിക്കാത്തവരായി ആരുമുണ്ടാകില്ല . സ്കൂൾ വിട്ട് വരുമ്പോൾ മാവിന് കല്ലെറിയാനും പേരമരത്തിൽ കയറാനും താൽപര്യം ഇല്ലാത്തവരായി ആരുണ്ട്. പുതിയ കാലത്തും അതിനൊന്നും മാറ്റം വന്നിട്ടില്ലെന്നാണ് ചില കാര്യങ്ങൾ തെളിയിക്കുന്നത്. എന്നാൽ, ഒന്ന് മാവിന് കല്ലെറിയാൻ തുനിഞ്ഞാൽ അതും സിസിടിവി പിടിച്ചെടുക്കും എന്നതാണ് ഇക്കാലത്തെ പ്രശ്നം. അത്തരത്തിൽ രണ്ടുമൂന്ന് കൊച്ചുമിടുക്കൻമാർ സിസിടിവിയിൽ കുടുങ്ങിയതാണ് സോഷ്യൽ മീഡിയയിൽ ഇപ്പോൾ വൈറലായിരിക്കുന്നത്. സ്കൂൾ യൂണിഫോമിൽ മൂന്ന് കൊച്ചുമിടുക്കൻമാർ മാങ്ങ പറിക്കാൻ എത്തിയതായിരുന്നു. മാവിലേക്ക് എറിയാൻ കല്ല് എടുത്തപ്പോഴാണ് ഒരാൾ ആ സിസിടിവി കണ്ടത്.അള്ളാ, മക്കളേ… അതാ ക്യാമറ’ എന്നായിരുന്നു സിസിടിവി കണ്ട കുട്ടി പറഞ്ഞത് . ക്യാമറ ഉണ്ടെന്ന് അറിഞ്ഞപ്പോൾ തന്നെ ഒരാളെ കാണാതായി.

ക്യാമറ കണ്ടെത്തിയ ആൾ ജീവനും കൊണ്ട് ഓടി. എന്നാൽ, മാവിന് കല്ലെറിഞ്ഞ മൂന്നാമത്തെയാൾ അവിടെ തന്നെ നിന്നു. പറ്റിപ്പോയ തെറ്റിന് ക്ഷമാപണം നടത്താൻ തന്നെ തീരുമാനിച്ചു. നിന്നിടത്ത് നിന്നു കൊണ്ട് പതിയെ ഒന്ന്, രണ്ട്, മൂന്ന് എണ്ണി ഏത്തമിടാൻ തുടങ്ങി. ഉടനെ തന്നെ ഓടിപ്പോയ കൂട്ടുകാരൻ തിരികെ എത്തി. കൂട്ടുകാരന് പിന്തുണ പ്രഖ്യാപിക്കാനായി ഒരു രണ്ട് ഏത്തമിട്ടിട്ട് ഓടിയെത്തിയ ആൾ തിരികെ പോകുകയും ചെയ്തു.മാവിന് കല്ലെറിഞ്ഞ കൂട്ടുകാരൻ ഏത്തമിട്ടതിനു ശേഷം പതിയെ തിരികെ നടന്നു പോകുകയും ചെയ്തു. തിങ്കളാഴ്ച രാവിലെ 11.51നായിരുന്നു സംഭവമെന്ന് സിസിടിവി ദൃശ്യങ്ങളിലെ സമയം വ്യക്തമാക്കുന്നു. മനോഹരമായ കമന്റുകളാണ് വിഡിയോയ്ക്ക് ലഭിച്ചിരിക്കുന്നത്. ‘ഓന്റെ ആ നല്ല മനസ്സ് ആരും കാണാതെ പോകരുത്’, ’90’s ആയതു കൊണ്ടു നമ്മുക്ക് ഇമ്മാതിരി ഐറ്റംസിനെ (ക്യാമറ) ഒന്നും നേരിടേണ്ടി വന്നിട്ടില്ല. നിങ്ങൾ പൊട്ടിക്കെടാ പിള്ളേരെ’, ‘നൊസ്റ്റു അടിച്ചു ഇപ്പഴും ഇത് പോലെ മാവിൽ കല്ലെറിയുന്ന പിള്ളേരെ കണ്ടതിൽ സന്തോഷം’, ‘അവനെ കിട്ടിയാൽ ഞാൻ 5 കിലോ മാങ്ങ വാങ്ങിക്കൊടുക്കും’ ഇങ്ങനെ പോകുന്നു കമന്റുകൾ.പട്ടാമ്പി വല്ലപ്പുഴയിൽ നിന്നാണ് ഈ രസകരമായ ദൃശ്യം സിസി ടി വി കാമറയിൽ പതിഞ്ഞിട്ടുള്ളത്