ചരിത്രത്തിലെ ഏറ്റവും വലിയ ബോംബാക്രമണവുമായി കഴിഞ്ഞ രാത്രി ഗസ്സക്ക് മേൽ ഇസ്രായേലിൻറെ നരനായാട്ട്

ഗസ്സ : ഇന്റർനെറ്റ് ഇല്ല, വൈദ്യുതി ഇല്ല, ഇന്ധനമില്ല. പുറം ലോകവുമായി ബന്ധപ്പെടാൻ യാതൊരു ഉപാധികളുമില്ല. എങ്ങും രോദനങ്ങൾ മാത്രം. അനാഥരാക്കപ്പെട്ട മനുഷ്യരാണ് ഓരോ ഇടത്തും. പ്രിയപ്പെട്ട എന്തെങ്കിലും ഒന്ന് നഷ്ടമാകാതെ ഒരാൾ പോലും ഇല്ല. നിസഹായരായ ആരോഗ്യപ്രവർത്തകരും മനുഷ്യാവകാശ പ്രവർത്തകരും. ഗസ്സയുടെ നിലവിലെ അവസ്ഥയാണിത്. പുറം ലോകവുമായി ബന്ധം നഷ്ടപ്പെട്ടതോടെ ഗസ്സ മുനമ്പിൽ എന്താണ് നടക്കുന്നതെന്നതും വ്യക്തമല്ല. ഇസ്റാഈൽ ഇന്റർനെറ്റും ആശയവിനിമയവും വിച്ഛേദിക്കുകയും പ്രദേശവാസികളെ പുറം ലോകവുമായുള്ള സമ്പർക്കം വിച്ഛേദിക്കുകയും ചെയ്തതിനെത്തുടർന്ന് ഗസ്സയിലെ ജീവനക്കാരുമായും കുടുംബങ്ങളുമായും ബന്ധം നഷ്ടപ്പെട്ടതായി ഫലസ്തീനികൾ, സഹായ ഗ്രൂപ്പുകൾ, പത്രപ്രവർത്തകർ, സിവിൽ സൊസൈറ്റി ഓർഗനൈസേഷനുകൾ എന്നിവർ പറഞ്ഞു.സൈബർ സുരക്ഷയും ഇന്റർനെറ്റും നിരീക്ഷിക്കുന്ന വാച്ച്ഡോഗ് ഓർഗനൈസേഷനായ നെറ്റ്ബ്ലോക്ക്സ് വെള്ളിയാഴ്ച വൈകി ഗസ്സ മുനമ്പിലെ കണക്റ്റിവിറ്റിയിൽ തകർച്ച നേരിടുന്നതായി റിപ്പോർട്ട് ചെയ്തു.

ബോംബാക്രമണം ഇൻറർനെറ്റ്, സെല്ലുലാർ, ലാൻഡ്‌ലൈൻ സേവനങ്ങളെ പൂർണ്ണമായും തടസ്സപ്പെടുത്തിയെന്ന് ഫലസ്തീൻ ടെലികോം ദാതാവായ പാൽടെൽ പറഞ്ഞു ഇസ്‌റാഈൽ അധികാരികൾ ലാൻഡ്‌ലൈൻ, സെല്ലുലാർ, ഇന്റർനെറ്റ് ആശയവിനിമയങ്ങൾ വിച്ഛേദിച്ചതിനാൽ ഗസ്സ മുനമ്പിലെ ഓപ്പറേഷൻ റൂമുമായുള്ള ബന്ധം പൂർണ്ണമായും നഷ്ടപ്പെട്ടതായി അടിയന്തര മെഡിക്കൽ സേവനങ്ങൾ നൽകുന്ന ഫലസ്തീൻ റെഡ് ക്രസന്റ് വെള്ളിയാഴ്ച പ്രസ്താവനയിൽ പറഞ്ഞു. നെറ്റ്‌വർക്ക് ഇല്ലാതായതോടെ അപകടങ്ങളെക്കുറിച്ചും പ്രതിസന്ധികളെക്കുറിച്ചും മുന്നറിയിപ്പ് നൽകുന്ന അടിയന്തര കോളുകൾ സ്വീകരിക്കാൻ കഴിയാത്ത അവസ്ഥയാണ് നിലവിലുള്ളത്. ഇതോടെ അടിയന്തര മെഡിക്കൽ സേവനങ്ങൾ നൽകാൻ കഴിയാത്ത അവസ്ഥയാണ് ഉള്ളതെന്ന് റെഡ് ക്രസന്റ് പറയുന്നു. പരിക്കേറ്റവർക്കും ചികിത്സയിലുള്ളവർക്കും വേണ്ടി ആംബുലൻസും മരുന്നുകളും എത്തിക്കാൻ പറ്റാത്തതിൽ റെഡ് ക്രസന്റ് ആശങ്ക പ്രകടിപ്പിച്ചത്. ഗസ്സയുമായുള്ള ടെലിഫോൺ, ഇൻറർനെറ്റ് ആശയവിനിമയങ്ങൾ അടച്ചിട്ടിരിക്കുകയാണെന്നും, അവർക്ക് അവരുടെ സഹപ്രവർത്തകരിലേക്ക് എത്താൻ കഴിയുന്നില്ലെന്നും യുകെ ആസ്ഥാനമായുള്ള ഫലസ്തീനികൾക്കായുള്ള മെഡിക്കൽ എയ്ഡ് ട്വീറ്റ് ചെയ്തു.ഗസ്സയെ ഇരുട്ടിലാക്കിയ ഇസ്റാഈൽ നടപടിക്കെതിരെ യുഎസ് കോൺഗ്രസ് വുമൺ അലക്‌സാൻഡ്രിയ ഒകാസിയോ-കോർട്ടെസ് രംഗത്ത് വന്നു. ആശയവിനിമയം തടസ്സപ്പെടുത്തുന്നതിനെ അപലപിക്കുകയും ആർക്കെങ്കിലും അതിനെ എങ്ങനെ പ്രതിരോധിക്കാനാകുമെന്ന് ചോദ്യം ചെയ്യുകയും ചെയ്തു.

പത്രപ്രവർത്തകർ.മെഡിക്കൽ പ്രൊഫഷണലുകൾ, മാനുഷിക പ്രവർത്തകർ, നിരപരാധികൾ എന്നിവയെല്ലാം അപകടത്തിലാണ്. ഇത്തരമൊരു പ്രവൃത്തിയെ എങ്ങനെ പ്രതിരോധിക്കുമെന്ന് എനിക്കറിയില്ല എന്നും അവർ ട്വീറ്റ് ചെയ്തു.അതേസമയം, ഫലസ്തീൻ ജനതക്ക് മേൽ ഇസ്‌റാഈൽ നരനായാട്ട് തുടരുകയാണ്. കരമാർഗമുള്ള ആക്രമണം തുടങ്ങിയ ഇസ്‌റാഈൽ ആളുകളെ കൊന്നൊടുക്കയാണ്. മൂന്നാഴ്ചയായി തുടരുന്ന വ്യോമാക്രമണങ്ങളിൽ മാത്രം 7,326 പേരാണ് കൊല്ലപ്പെട്ടത്. കരമാർഗമുള്ള ആക്രമണം കടുപ്പിച്ചാൽ മരണം പലമടങ്ങ് വർധിക്കും. ഗസ്സയിൽ അതിർത്തിയോട് ചേർന്ന് മൂന്നിടത്താണ് ശക്തമായ വ്യോമാക്രമണം നടക്കുന്നത്. ഗാസയിലെ അൽ ഷിഫ, ഇന്തോനേഷ്യ ആശുപത്രികൾക്ക് സമീപവും ബ്രീജിലെ അഭയാർത്ഥി ക്യാമ്പിന് സമീപവും സൈന്യം ബോംബുകൾ വർഷിച്ചു. നൂറിലേറെ പേർ ഇവിടെ കൊല്ലപ്പെട്ടതായാണ് റിപ്പോർട്ടുകൾ.